أزاي متخليش كلبك ياكل من حد غيرك .

 السلام عليكم ورحمه الله وبركاته ويارب تكونوا بخير،  ازاي الكلب بتاعي مياكلش من حد غيري ؟! بص يا معلم الخطوات بسيطة جدا بس محتاجه صبر لانها بسيطة بس بتاخد وقت كبير ، الموضوع ده مهم لان في ناس كتير مننا خسروا كلابهم بسبب ان فيه حد غريب رمالهم اكل مسموم وعلشان كدا هنتكلم النهاردة عن إزاي  تخلي كلبك مياكلس من حد غريب مهما كان الأكل  ده . 

اولا : بص يا سيدي كان فيه طريقة بتتقال إنك تحط كمون او اي نوع بهارات علشان الكلب يتعود على طعم الاكل بالكمون فمش هياكل  اكل من غير كمون بس نجاح الطريقة دي ضعيف جدا واغلب الوقت بيفشل 

ازاي هنقدر نعمل كدة ؟! تعال اقولك ... علشان تقدر تنفذ الطريقة دي فانت لازم تعملها على كذا مرحلة : 

- اول مرحلة

 انك بتدرب الكلب على تدريب  stay  أو   leave it    وفي التدريب ده يكون الكلب واخد وضع stay   ومجاش ورايا علشان يفضل مكانه ويثبت وميروحش  للأكل  وده هنعمله باننا نجيب لعبة او كورة وترميها على الأرض  وانت مخلي الكلب في وضع stay    الكلب هيبص عليها وممكن يروحها هتندهله  اول ما يبصلك  تديله مكافأه وكرر معاه لحد ما يوصل انه ميبصش للكورة اصلا ودي المرحلة الاولي . 

- - المرحلة الثانية 

ودي هنجيب فيها نوعين اكل واحد الكلب بيحبه جدا والتاني نص نص ، يعني مثلا فراخ وزبادي  او بيض وجزر  ، او دراي  فراخ  ، هتجيب اللي بيحبه نص نص وتحطه قدامه هيروح ياكله  تحط ايدك عليه الكلب هيحاول ياخده وانت تنده الكلب بكلمة لأ او no   زي ما انت معوده لحد ما يسيب الأكل ويبصلك  هتديله الاكل اللي بيحبه اوي ، وممكن برضو بدل لأ تقوله سيبها او leave it   ، في الاول طبيعي مش هيكون فاهم وعايز الأكل  بس طبعا انت بترفض لحد ما يتعلم . المرحلة دي بتم لمدة ٤ ايام في الطبيعي .

- المرحلة التالتة

 ودي هتحطله فيها الاكل اللي بيحبه وتعمل نفس الموضوع معاه بعد كدة تجيب حد غريب على الكلب وتخليه  يرميله اكل  وانت تقوله stay او سيبها زي ما عودته  الكلب لما يبصلك  هتديله المكافأه  لو غلط مش مهم بس مهم انه ميروحش  ياكل الحاجة  دي تمسكها قبله ، الاول صاحبك يرميها تحت رجلك انت بعدها يرميها  اقرب للكلب  بس طبعا  ده لما الكلب  يتعلم شويه  هيرميها  اقرب فأقرب  لحد ما يرميها  على بوء الكلب  وانت بتقولها سبها  بعدها تبدأ  وتكون انت واقف على باب الاوضه وتخرج من الأوضه لحد ما الكلب مياكلش اي حاجة بتترميله  غير بأمر منك،  ممكن حد يسألني طيب انا عايز مياكلش وانا مش موجود وده هنقوله في المرحلة الرابعة ، والمرحلة دي هتكون لمدة اسبوع ع الاقل. 

- ملحووووظة  ،،،،،،المرحلة الرابعة

 و هتتم اننا بنفذ كل اللي قولناه  في المراحل اللي فاتت على الكلب خطوة بخطوة وتنفذ مرحلة بمرحلة ولازم تتأكد ان كل مرحلة الكلب بيستجيب معاك وبعدها ترجع تسمع المرحلة الرابعة  وده بنقوله لانك لو استعجلت فيه والكلب مأتقنش  الكلام ده يبقى المرحلة الرابعة ملهاش لزمة  لانك هتلاقي الكلب بيغلط فيها  ، ولو نفذت كل ده ولقيت الكلب بيغلط فيها يبقى لازم تعيد المراحل اللي فاتت  . 

- المرحلة الرابعة  هتبدأ فيها كالآتي   اول حاجة هتقف بره الاوضه بتاعه الكلب على اساس انك مش موجود  بعدها ب ١٠ دقايق صاحبك يدخل على الكلب ويرميله اكل من بعيد وهنا هتستنى  تشوف الكلب  لو راح ع الاكل وشمه وبدل ياكله  تروح داخل مزعقله  بس من غير ضرب وتمسك الأكل ترميه  بعيد عنه  بس تعمل ده قدام عينه   ، او ممكن تحط الأكل ف ركن من الأوضه  وتخرج ونستنى بره تشوفه هيعمل ايه لو راح ع الأكل  علشان ياكله تزعقله  تاني وتشيل الأكل  خالص لو مأكلوش  و تبدله بأكل كويس ولعب كتير  ، وتعمل الحركة دي مرتين او ٣ على مدار اليوم وكل مرة تتأخر أكتر في الدخول على الكلب  مثلا مرة ٥ دقايق ومرة ١٠ دقايق ومرة نص ساعة  ومرة ساعة ، والسؤال هنا طب لو راح  اكله وانا شيلت الأكل  اروح بقى ولا اعمل إيه؟!! اللي هتعمله انك هتاخد الأكل  قدامه وترميها وانت بتقوله سيبه ولما يسيبه  تديله مكافأه  لحد ما بتعلمها مظبوط ، والمرحلة دي بتكون لمدة ٢٠ يوم لحد شهر وممكن أكتر كمان . 

- الموضوع طويل جدا وبياخد  وقت والتدريب ده بيخلي الكلب متقدم جدا،  الكلب اللي بيعرف يعمل كدة بيصنف من طبقة اسمها " Well trained '  وهي الكلاب المتطورة في التدريب.

و اهم حاجه في الموضوع كله ان الكلب لازم يكون بياكل في وقت ثابت و عدد وجبات ثابته يوميا عشان يكون شبعان و بيجوع بس قبل ميعاد الوجبه التانيه