مقارنة بين البيتبول و الدوجو
السلام عليكم ورحمة الله وبركاته ويارب تكونوا بخير ، هنتكلم النهاردة عن مقارنة من حيث الصحة ،والقوة ، الصفات الجسدية، الصفات المزاجية، القدرة على الحراسة، سهولة التنظيف، القدرة على التدريب ،العمر والتوالد .
أولا الصحة : الكلبين بيتميزوا بمناعة عالية ضد الأمراض ومفيش اي أمراض مزمنة بتيجي للكلبين غير حاجة بسيطة كدة وهي ان الدوجو بما انه فيه أبيض ف نسبة ١٥% من الجراء بتتولد عندها صمم (طرش) في ودن او الودنين وتتجنب ده باختبار السمع عند شراء الجرو.
ثانيا القوة : الكلبان عندهم قوة عالية جدا ونشاط عالي جدا ولو ان شخص هادي او غير رياضي لا يفضل تربية ايا منهم وده بسبب انهم بيحتاجوا جري باستمرار ، اما من حيث ( قوة العضة ) البيتبول بعد من أقوى الكلاب في قوة العضة اما الدوجو فهو بيتميز باحكام العضة لان فكه على شكل مستطيل بيقفل بالفك العلوي والسفلي مع بعض على نفس القطعة وبرضو قوة العضة مش ضعيفة يعني قوية وكمان محكمة .
ثالثا الصفات الجسدية : الاثنين بيتميزوا بجسم عضلي رياضي بيحتاج لتمارين ومكملات غذائية عشان يظهر ليهم التقسيمة العضلية بس البيتبول متميز جدا عن الدوجو في الحجم والتقسيم العضلي ،
الالوان: في الدوجو الأبيض بس ، اما البيتبول فكل الالوان مع بعض او كل لون لوحده ، (أزرق رمادي ، أحمر فون ، ابيض، واسود )
رابعا الصفات المزاجية : البيتبول عنيد الدوجو اكثر منه في العند يعني لو بيتبول عنده بدرجه ٦ من ١٠ الدوجو عنده بنسبة ٩ من ١٠ ، البيتبول شرس جدا ضد الحيوانات متوسطة الشراسه مع البشر اما الدوجو شرس جدا جدا ضد الحيوانات خاصه الكلاب وشرس جدا مع البشر ايضاوبيتفوق على البيتبول في درجة الشراسة .
خامسا القدرة على الحراسة: ممتازين لو هتحرس مكان انت مش موجود فيه ، لأنهم بيتعاملوا من غير نباح ، يعني لو موجود في بيت وبتربي دوجو او بيتبول لا قدر الله تنزل تلاقي حرامي مرمي في الجنينة ودي ميزة الكلبين انهم بيتعاملوا بس ف نفس الوقت عيب لأن الهدف من حراسه المنشأت ان الكلب بيكون بينبح علشان يبعد المتعقبين علشان كدة الكلبين بره تصنيف حراسة المنشأت بس هما متميزين في الحراسة الشخصية.
سادسا مناسبة التربية : البيتبول بيكون مناسب للبيت لانه بيحب الاطفال جدا بس طبعا تحت رعايتك ويكون اتربى معاهم من صغره ، الدوجو لا يصلح للتربية ف البيت ، الكلبين بيحتاجوا خبره منك ومينفعش تربيهم لو مبتدأ .
سابعا التنظيف: سهل جدا للكلبان مش بيوقعوا شعر وشعرهم صحي جدا وقصير .
ثامنا القدرة على التدريب : تدريبات الطاعه صعبة جدا وبيحتاجوا خبره كبيرة ، تدريبات الشراسه سهله لأن شراستهم الفطرية عالية جدا ، التدريبات البدنية سهله لأن درجة نشاط الكلبان عالية جدا .
تاسعا العمر والتوالد : البيتبول بيعيش من ١٠ : ١٥ سنة ، الدوجو متوسط ١٤ سنة
التوالد: البيتبول بيولد في المتوسط ١٤ جرو ، الدوجو متوسط ٨ جراوي .
في النهاية احب اقول انه ممكن يقابلك بيتبول او دوجو ذكي مش عنيد ، او جبان وشراسته الفطرية ضعيفة ، وممكن يقابلك بيتبول او دوجو كسول مش نشيط بس تأكد ان دي حاجة نادرة .
ليست هناك تعليقات